2007/10/14
連續兩日六點起身, 勁眼瞓!
是次行程, 蘇梅只是中途站, 目的是留一晚等船去龜島。
因此我們選了近碼頭的小小hip hotel: punnpreeda
沒有上次來蘇梅住的連鎖酒店豪華;
(不會俾兩間屋旅客: 一間瞓, 另一間做客廳及廚房。)
punnpreeda夠"骨止", 可入住獨立小屋, 不誇張, 啱啱好。
旅客少, 地方細, 一出房門便可獨霸小infinity pool。
而且小沙灘就在infinity pool旁, 方便得很。
泳池旁的餐廳亦不錯, 好sun-bather friendly。
曾睇過有網頁寫, 近七成泰國的diving master來自龜島。
加上朋友之前去過大力推薦, 話氣氛及見既野幾多。
昨日在punnpreeda book了sea tran船飛,
每日只有一班8am早船去龜島。(samui airport都可訂購)
一早車子來接我們, 同行的有昨日認識的挪威夫婦。
甫check out便下大雨, 好彩有帶遮。
不用3分鐘便到達碼頭, 停左雨, 買兩支水便上船。
(掛住拉行李, 事後睇相才知道上船時天空有彩虹!)
sea tran比想像中企理, 有mini bar, 廁所乾淨。
我們和挪威朋友在1.5hr船程中繼續吹水，
談中港經濟、挪威及香港稅制、
點分日本人、大陸人及香港人、
點分挪威人、德國人及美國人...
大陸一孩政策、內地孕婦來港、
挪威日照時間、當地政府點呼籲國民生多d...
挪威住屋同香港住屋比較、工作時間、
教育政策、天氣、其他地方旅遊推介 etc.
下船後, 龜島碼頭人頭湧湧, 車也多...
我們匆匆交換聯絡方法便分別了。
我們尾隨一位大嬸上左架後座無蓋的貨車,
便前往ban's diving resort了。
單看門面, resort很up dub, 但越深入的行,
原來別有洞天, 不是奢華, 而是五臟俱全。
七仔、食肆、潛水用品店、網吧...
全都在resort及沙灘之間的路。
我們預訂了ocean view suite,
有熱水、冷氣、雪櫃、電視及dvd player,
在咁raw的地方來說已經好好了。
由於忽然下大雨, 加上眼瞓,
沖過涼, 吃過外賣pasta, 寫下日記, 便午睡去。
黃昏醒來, 雨停了, 齊齊去樓下做massage。
我選了兩小時aroma massage加foot massage,
老公就做thai massage加foot massage,
兩個加埋才1300baht, 即是每人百幾蚊, 好抵。
之後在附近的店買左件紅白水玉bikini, 大スキです!
再去吃晚飯, 呢度d餐廳好得意, 間間都播戲。
我們選了一間正在播colin firth主演、有關caesar的戲。
期間不少狗狗在檯與檯之間穿梭,
牠們不是來討吃, 而在坐座地布梳化睇戲, 爆笑。XD
回房後我地睇HBO播superman。
明天一早就要上advance open water, 好緊張啊!
2007/10/15
一早吃過ham & cheese pita, 便去見教練。
我們要求廣東話教練, 一來方便老公, 二來貪會少人d。
我們的diving master叫dominic, BBC, 廣東話識講唔識寫,
quit左london份工去旅行, 然後在此教潛水, 遲d12月會返香港。
上了一會theory, 學下計diving time etc, 我計得好鈍~
我們扒了杯麵便上船, 由於食太飽, 穿上wetsuit已經唔太舒服。
我們首先來deep dive 30m @ chumpon pinnacle。
見到幾條鯊魚, 一些蘇眉, batter etc。
上岸後忽反胃, 嘔哂d杯麵出來... -___-"
小休50mins, 我們到red rock (hin daeng)玩multi-level dive。
今次dominic要我地自己搵路, 要潛過一個cave再潛番上船。
我呢個方向感白痴唯有靠老公... 老公好叻無賣我豬仔。
潛完個人謝哂, 回房間攤屍。
明天仍有3個dive, 真是唔敢食野了!
2007/10/16
一早不停打乞嚏, 包左成卷廁紙雲吞。
８點出海到Twins玩navigation dive。
要方向感白痴用compass搵路..
幸好只是跟教練爭5m距離, 算過左骨。
之後自己潛, 當然是老公帶路。
再開船往white rock做浮力測試。
捐過D四方形框框, 用呼吸器撞低d目標, 做倒豎衝。
兩次dive見過nemo, 蘇眉, 蝦, 魔鬼魚etc。
回resort吃午餐, 不敢多吃了, 吃了老公少少炒飯。
期間餵了坐隔離的狗狗吃雞肉。
佢既閃眼攻勢太強勁, 令人想起einstein!
令我忍唔住餵完一次又一次。
(btw, jeff少話dali呢幾日成日刮我地房門meow。
而einstein就自顧自玩米袋, 無理jeff少。)
休息幾小時, 晚上６點又出海夜潛。
趁出發前同主子影d沙灘相。
海面頗大浪, 我同老公都有d反胃。
anyway, 入左水會好好多。
首次黑夜潛水, 要用電筒睇野, 好刺激。
見了石頭魚、魔鬼魚及好長好尖的魚吃小魚etc...
潛的時候背脊有Ｄ野拮拮地, 上水除wetsuit後,
發現原來是一隻小蟹!!! (我們都笑左好耐。)
老公上水後終於嘔左出來。好彩我無乜食野, 頂得住。
(我潛咁耐水以來, 昨日是第一次嘔... 懷疑是感冒作怪。)
anyway, 明天不潛了!! 我地已經畢業o勒! *____*
我可以吃感冒藥止鼻水了。
2007/10/17
是日休息日。瞓到好晏至醒。
現在先上下網止癮。
一陣見dominic 簽埋潛水log book。
下午會曬太陽及做馬殺雞(massage)。
