補番主子１４個月大的大頭相。
einstein d 紋越來越深色~ 貓老了, 也會出色斑? kaka!

Posted by at 9:15 PM | Permalink | Comments (0)

老公換新銀包時, 大少博命撲銀包既繩~
佢地就咁又玩一餐!

Posted by at 5:00 PM | Permalink | Comments (0)

基因變異啊! x-men啊!
einstein既顏色越來越似dali了~
大少好似只有頭頂至肩膀,
心口及前腿上半截是純白色。
昨晚兩兄弟"依噏"時拍的。

Posted by at 9:30 PM | Permalink | Comments (0)

今日是兩位主子１４個月大慶祝日, 一早嘆罐applaws~

飲過茶, Jeff別過兩位少爺, 便執包袱回家, 真是辛苦哂!
佢話呢兩星期einstein有得食便可以, dali就比較自閉,
晚上兩兄弟會自己玩, 撲來撲去, 及霸左佢張床。
兩位少爺曾襯Jeff去廚房時, 成功潛入廁所,
被發現後便扮無知走番出來!
另外某天einstein悄悄地在Jeff的袋偷走一個吉既麵包袋,
擔到走廊, 到Jeff追過去時, 佢立即棄袋潛逃! kakaka!

回家時開信箱, 有我寄給einstein & dali的postcard家家~

今日再透徹d梳毛, 仲拆埋主子手信no.2: 小電剪一個!
非常輕巧、易用、安全~ very good!
首先在自己的手試用, 跟住是搵最淡定的dali試反應... 連大少都無乜反抗。

Posted by at 5:50 PM | Permalink | Comments (3)

回來了! Jeff一開門, 爆大冷, einstein躱到貓樹底,
反而dali走來聞下我地!
(不知是大少忘了我們定驚左個suitcase的滑行聲。)
Jeff說einstein不俾佢清潔, 所以眼鼻下巴都好dirty~
dali就一向乾淨, 只是不俾Jeff梳毛。

大清潔後, 同主子戴上pet paradise買的collar~ kiki!

我們今晚大被同眠吧!

Posted by at 12:50 AM | Permalink | Comments (5)

2007/8/4

一早六點醒左, 在房內上下網, 然後又睡。
到九點幾起身去吃酒店早餐, 又繼續睡, 等商場開。
日本天文台果然準, 雨下個不停。
我們再去買了點porter東東,
本來想去samanatha thavasa再敗家, 點知想要的已無貨。
行左好多寵物用品店, tokyo hands頂樓及esta９樓都有貓狗睇。
仲買左個小型剪毛機及多舊除貓毛神奇海綿~
後來在esta 10樓的拉麵共和國吃拉麵, 是歷來最好味的拉麵。

拉麵共和國麵や雅, 掂!

在esta見到1:1 dobby!

地下街又見到dali poster.

今次行程買買埋埋的porter。我們已經看厭水玉headporter, 偏愛庶民版。

是日最令我興奮的一環, 就是在stella place 5樓見巨型cheburaska! 開心死我!

再買dd小cheb產品... 原來佢已經成為sony creative products一員!
這就是蘇共國寶的下場! anyway, 出唔出game先? *___*

今晚決定吃地下街的回轉壽司! 明天回港服侍主子!

Posted by at 6:00 PM | Permalink | Comments (4)

呢篇日記好長, 請慢用!

-------------------------------------------------------------------
2007/8/3

是日早餐。

趁未check out前同福仔行街街。
check out上車前, 老闆娘ayumisan追出來給我們小禮物:
自家製薰衣草包兩個, 很可愛呢!

終於回到札榥, 在酒店check in後便去蟹將軍吃lunch, 一吃２小時!

我們點了這兩個set。

之後回toyota還車, 整花架車盛惠$1300, 老公說是交學費喎! 俾佢激死。
日本正受颱風５號影響, 明天可能打到北海道, 因此我們大抵會改行程,
不去小樽, 改在札榥shopping吧! kakaka! (橫掂上次都去過小樽, 無所謂啦!)
不過希望不要影響後日航班啦! 我要見主子啊!

晚上在uniqlo買左條skinny jeans,
在書店買左本無nana睇既cookies呻笨...
在地下街覓食時見到一張cheburaska海報, 說明天在stella place有function?
唔知佢寫乜, 聽日有時間去八下先!

在地下街行左兩間貓貓用品店,
結果在italia食堂醫肚, 有生雞蛋的carbonara~ 正!

去完internet cafe, 老公在酒店追看爆笑日劇"壽司王子",
我就超開心發現今晚呢間房是可以偷到wi-fi用, 發達啦!

-------------------------------------------------------------------
2007/8/2

八點準時去吃早餐, 先來一杯菜湯, 然後是烘熱了的麵包及main dish,
再來一杯茶, 醒神。

早前kumansan已提點是日會下雨,
因此我們早兩日已經完成所有富良野及美瑛的行程。
今次去的北龍町向日葵園比較遠,
因之前所得資料有限, 唔知原來近旭川, 所以要走番回頭。
用之前kumansan宿友提供的GPS number, 我
用了兩小時走國道到達北龍町向日葵園。
嘩! 雖然天陰陰多雲, 但勁多太陽花啊!
仲有鴕鳥及鴨子, 終於有個花園是沒有香港人了。

北龍町向日葵園

逛夠了我們便用GPS找地方吃, 原來在向日葵園隔離就是sunflower park hotel,
一駛到門口, 便被佢既龍門招牌懾住, 忍不住爆句: 嘩! 魔神英雄傳啊! XD
在鄉下地方來說, 應該是最高檔的了,
不過餐廳食物唔貴, 同平時差唔多, 味道ok啦!

吃飽了, 一上車無耐, 個天就下大雨來! 我們決定乖乖的回民宿休息。
(回程也用了2小時, 其間老公掛住望GPS, 衝了一次紅燈... -__-")
anyway, 我完好無缺的回到ayumu pension,
寫下日記吃下草餅, 便要吃晚飯了。

-------------------------------------------------------------------
2007/8/1

吃過homemade breakfast, kumansan又要我們抽籤, 原來是送禮物給我們!
我選了個由kuma媽媽整的花花布袋, 老公要了kumansan的鎖匙扣。
臨走前, 大家都跟kumansan合照。kuma媽媽仲摸一摸我, 話我件gap外套好靚!

8:35am到達富田農場, 無乜人, 爽啊!

玩到10點幾, 見一車一車大巴殺到才走人...
之後懞盛盛以為去左彩香之里, 到吃午飯時才發現原來那是町營薰衣草園!
anyway, 在町營薰衣草園坐吊車上山睇薰衣草, hea左一陣無乜野睇, 便下山。

入過油後, 我們輸入GPS打算去町營薰衣草園(仲未知自己搞錯地方),
點知去番之前既location...
在疑惑重重之時, 我們決定在附近的北之咖喱工房Kirara醫肚先。
問過waitress才知自己已經去左町營薰衣草園,
反而未去彩香之里, 好彩都是在附近。

阿Roy, ra & re 在Kirara

起程去真正既彩香之里, 好彩搞錯了~ 原來彩香之里勁靚勁少人。
由佢來做富良野花田遊的壓軸是最好。

嘆夠花海便去芝士工房。地方細, 芝士種類太少... 真懷念荷蘭的芝士廠。
買了樽牛奶及小cheese cake在花園吃。再往前面的羊欄同羊咩咩玩左陣便走。

臨去中富良野的民宿前, 我們先往便利店入貨。
離開時, 老公又唔望左右, 只顧住睇個gps,
唔喝住佢停既話, 差d俾右面來的車撞... 激死...
(仲有兩日捱架... 唔好再犯錯啦, 唔該! 我仲要見einstein同dali架! )
沿著花人道237, 在鹿討車站附近就是我們的中富良野落腳點Ayumu Pension。
貴kumasan一半, 但典雅細緻的設計, 非常女性化及令人舒服,
同kumasan咁man既的屋形成強烈對比。
迎接我們的, 是福仔(7歲狗女)的吠聲。
佢係Ayumu Pension既吉祥物, 仲有個online photo album呢!
老公泊極都泊唔好車, 老闆娘Ayumisan替佢泊, 一野搞掂, 型啊!
我們住"綠"室, 好大, 地面有twin beds, 仲有個閣仔及樓梯, 上面可以訓塔塔米。
窗口直望綠油油的花田及山景, 設備充足, 雖然都是share toilet及浴室, 但好靚。

由於滿室, 入住的全是日本人, 好多是一家大細, 有見及此, 我們提早沖涼。
6pm吃晚飯, 有soup, starter, main course, dessert,
非常悉心安排, 超飽肚美味。
連從來不吃蕃茄的我, 也吃了好多, 很甜美爽口新鮮, 完全無酸味。

吃完飯, 我們去後門找福仔。職員仲問我們拖唔拖佢出去行下, 當然好啦!
福仔一見人放佢, 開心到跳下跳下, 我一拖佢就一支箭標出去!
我摸佢一下屁股便會sit, 唔覺意階到佢既肚仲立即反身俾我地玩! 超乖啊!
我們仲笑einstein分分鐘肥過福仔, 不如拐埋佢番香港~~ :p

-------------------------------------------------------------------
2007/7/31

正式開始explore美瑛之旅, 吃過homemade breakfast, 我們便去開車。
老公在kumansan carpark倒車時, 撞花左宿友既車。
(當時我在車外, 叫都叫唔切... -___-" 真是罪過... 搞到人地...)
我們便立即通知kumansan及有關宿友... (佢地都是租車既。)
kumansan非常pro, 立即記下現場資料, 幫我地駛番開架車,
仲替我們畫了張圖及撮要事發經過。

結果我們和宿友拎住張紙, 依租車公司指示去中富良野警署備案。
(幸好宿友的日文非常好, 同日本警察溝通無問題, 我們很快會搞掂。
不過搞到人地遲左成個鐘去富田農場, 真是非常內疚!)
再三向宿友道歉後, 我們開始去睇花, 但應該可以想像我塊面黑過隻鑊!
由於差館近日之出公園, 我們便先去那兒, 那本來就是我預定今日第3站。
泊好車, 我們行上山到達展望台, 一大片薰衣草花海就在眼前, 無乜人, 幾好。

日之出公園

下一站四季彩之丘, 可以租golf car/ATV/tractor四圍行, 幾多花臣。
我就走路已經夠, 地方不是大到行死人嘛!
後來開始多人, 我們便掃手信及往飯堂吃天婦羅飯。

四季彩之丘

吃飽飯去Kan之Farm, 就在kumansan附近, 是我這天最喜歡的花場,
小巧精緻, 呆在那兒好一段時間, 在小店舖買了束花送給宿友賠罪。

之後遊trick art museum, D 畫幾得意, 不過好快行完。

trick art museum

回到kumansan, kuma爸爸專誠睇住老公泊車, 真周到。
我就踢左老公去對面街鋪頭買密瓜請大家吃賠罪。
由於早左返來無所事事, 我們便在民宿拍照。
其間老公仲替kumansan搬檯, 好重哩!

晚上我們在kumansan度買左包煙花, 同其他香港宿友一齊玩。
原來燒煙花是女士專利, 男人們都是負責幫手影相!

燒完煙花, kumansan較好telescope, 讓我們近距離睇月亮。

-------------------------------------------------------------------
2007/7/30

吃過豐富的早餐, 我們便check out乘的士去toyota拎車。
那兒的職員英文唔掂, anyway, 拎左車便算。

一上老公架車, 就開展我既觸目驚心之旅,
真唔明白佢點解可以拎到driving license。
(佢既絕招包括轉彎時用力踩油, crossroad唔望左右,
泊唔好車, 唔專心而駛歪架車etc...)
輸入GPS, 往旭川既旭山動物園, 我們便由expressway離開札幌了。
經過兩次中級危險的經歷, 包括踩油轉又急又窄既彎,
以及無望路面, 在公路由左線飄左去右線都唔知... 結果終於到達動物園。
旭川天氣比札幌熱多5度, 有成23度, 仲好曬添!
外觀上以為旭山蠻"up dub", 但實際入到去, 喜歡到不得了。
design及安排非常好, 就算是超多人, 但一點也不用久等, 很快可以看動物。
我們先後睇左海豹、北極熊、棕熊、leopard、黑豹、
獅子、黑猩猩、皖熊、企鵝、仲有大量貓頭鷹~

北極熊交足功課, 仲係我地而前示範peepee! kakaka!

在旭山由11點幾玩到下午3點, 雖然未睇哂,
但都要出發往美瑛了, 費事太夜到達。
輸入trick art museum的GPS number, 我們又開始駕駛。
老公臨尾整鋪杰, 發現爭d駛過trick art時, 忽然扭軑轉入去,
搞到大V turn剎車。好彩附近無人無車, 唔係就杰。
但佢竟然仲夠膽死若無其事話"無野啊!"; 架車仲未停好向下溜都要我提。
呢個時候我終於爆發小宇宙, 用中高級凶狠語氣,
問佢究竟知唔知自己做緊乜 ...呢個時候佢先會認錯!
anyway, 襯我未殺佢之前, 我下車去找預訂了的民宿峠のkumansan。

原來在trick art旁的深山峠展望台是可以見到kumansan的巨型儲水塔,
上面仲有佢既熊logo。

我們駛回trick art旁的小路, 5點幾就到達kumansan了。
一如好多網友所說, kumansan風趣好客, 英文廣東話都ok,
整幢房子是他及爸爸自己一手一腳建造,
好raw, 很有風味, 仲好配合大自然, 佢仲有自己既小花園種野及養雞、羊、兔。
kumansan介紹了設施後, 便要我們抽籤住邊間房。
我們抽了1號, 是main building 上層向公眾露台, 不會太光, 亦有陽光, 幾好。
是日有12位香港客, 晚上7點半吃kumansan住家菜。

由於人多費事排隊, 吃飽便馬上洗澡, 基本上幾時都可以沖涼,
只要出聲叫kumansan開熱水涼就可以。
之後回房用macbook看早前在澀谷HMV買的"耳折貓兄弟"dvd,
一路睇一路說: "啊! dali啊! 啊! einstein啊!" 看完睡覺。
(晚上夢見朋友阿pow來了民宿同老公傾偈,
我見到佢便說不如你駕車啦! 我唔想再坐老公既車!)

Posted by at 10:15 PM | Permalink | Comments (13)

2007/7/29
一早起身等巴士去羽田機場, 見到兩位白撞既貓~
第一次坐機場巴, 超方便舒服, 仲經過東京塔, 台場及彩虹橋。

到達札幌, 得18度, 比東京凍好多呢! 無乜帶厚衫添... 弊!
(好彩之前在澀谷gap買左件褸仔, 之後再在札榥uniqlo買套厚睡衣。)
anyway, check in 後搵地方醫肚, 路過北海道廳舊本廳留影。

經過蟹將軍, 結果在拉麵橫丁吃了超yummy叉燒麵, 仲任食玉子呢!

吃飽飽去參觀計台, 仲見到dali展覽的poster!

天很藍, 在電視塔下hea左一陣。

晚上懶惰在酒店旁的地下街覓食, 在pepper lunch吃鐵板燒, 大大塊扒無得頂!
明天首次坐老公車呢! 好緊張啊!!! >___<

Posted by at 9:50 PM | Permalink | Comments (10)

複製貓啊!

Posted by at 11:00 PM | Permalink | Comments (0)

當阿roy 跟dali 如膠如漆時, 醋酲einstein有點不知所措。

Posted by at 6:15 PM | Permalink | Comments (0)