Back to my blog or Go to my website
« Page 11 of 11
行左寵物展, 出發前在pet forum已經知搞得不是太好,
所以都有心理準備不會滿載而歸。
場地細, 衛生麻麻, 參展商唔多, 不過好多狗睇。
帶細狗及溫馴既狗去都ok既...
真係唔明, 點解會有狗主帶兩隻洛威那到場...
anyway, 終於買了個 pet carrier 及兩件小玩物。
一直在市面都找不到想要既pet carrier... 一係設計唔好, 一係太貴。
要夠大、多透氣位、質地好、好拎及唔好太姣。(因為九成是老公拎嘛...)
在展場發現港產新公司dog voyage, 袋既手工幾好及設計幾窩心,
單是兩端活門附有磁石貼設計已經加左好多分,
仲要是軍綠色, 0岩老公揹~ kiki...
廿元的小玩意, 不是給blythe玩的噢!
下星期再戰灣仔貓展!
『香港貓貓博覽暨香港貓迷會第十屆冠軍貓展』
日期：2006年8月5-6日 星期六、日
時間：8月5日 中午12時至下午8時
8月6日 上午10時至下午7時
地點：香港會議展覽中心 2號展覽廳
呢幾日殺遍旺角、太子、銅鑼灣,
始終沒遇上想買的貓床。
今晚結果走了去cwb吉之島10蚊店,
盛惠110大元, 買了少少貓用品。
10蚊一個鐵糧兜, 仲要有防滑膠邊, 抵到爛。
(一直都唔想買膠糧兜, 費事貓貓下巴出暗瘡~)
衣服碌碌是養貓朋友推介, 買埋refill, 試過可以碌走好多貓毛。
即棄便便紙可以鋪在貓貓出街袋裡, 方便清潔。
順手掃埋竹蓆, 可以鋪在水樽及糧兜下。
毛毯質地好柔軟, 貓貓應該會鍾意。
係, 大鄉里出城, 第一次買貓糧。
由於貓貓快可以戒奶, 自己本身唔鍾意朋友用開既royal canin,
所以要買定自己心目中既貓糧俾朋友餵貓bb~
(做完research後, 真是非常抗拒比貓貓吃用肉類副產品(by-products)既貓糧,
睇過cats.about.com推介既幼貓糧成份後,
決定都是用nutro choice's complete care kitten。)
一早已經鎖定一些網上商店可以日後買到呢隻糧,
由於只買一包, 費事online order,
放工行勻旺角都找不到, 結果都是去了太子某店買到,
都好, 證明以後只用行銅鑼灣的店, 因為至少有兩間店有得買。
抱著3kg的貓糧回家, 聞到有一點香味, 好似好好味咁...
老公笑說我不要自己拿去吃... 嘿嘿!
早前睇fromm全貓糧的雜誌廣告, 我已經好想吃...
有鴨肉味又有三文魚味... 真是好吸引... 等貓貓大d比佢試下~~
我個人傾向貓貓多元化飲食, 即是唔好只食一隻糧,
成貓糧心目中有幾個心水, 但市面揀得落手既幼貓糧選擇不多~
最近買既兩本貓書, 誠意推介俾大家:
(click the pictures for official sites)
 
左: 台灣貓書Cat News, 7-11大特價, $20兩本, 全彩色, 照片好靚, 絕對推介~
(想買番#1, 8, 10, 15看... *__* <-- details pls click the above pic. )
右: 蘇菁菁著的"貓貓食得天然", 土產貓貓飲食指南, 資料詳盡, 養貓人必看, $58, 買啦!
縱然小時候家裡曾短時期有兩隻惡死波斯貓出現,
但說實在, 我對佢地認識是零。
如今決定再養, 就四出尋找資料。
貓書推薦:
(1) 3隻貓月刊, 寵物雜誌來說印得是比較好, 相靚連廣告都靚d。
薄就薄d, 不過唔睇唔安樂。偶爾附送窩心的貓玩意, 幾好。
(2) cat's life月刊夠多野睇,夠雜, 相就麻麻, 好過無。
(3) 貓咪問你的101個問題, sogo書店買的。以貓角度剖析飼養問題, 文字為主, 實用。
(4) 和貓幸福生活, page one買。日本仔出版, 相多、圖表清晰, 分類好。
有埋貓種類介紹及易養度、照顧、打理etc... 養貓入門首選。絕對推薦人去買。
(5) 鍾意你條尾, page one 買。新城DJ出的教人養貓既書, 夠平, 算是齊料。
只是無貓種類介紹、印刷及相片極差, 不過幾廿蚊就非常詳盡教哂你點養, 仲想點?
睇得出作者是真心喜歡貓的, 入門次選。
當然網上交流都是學養貓的好辦法~
香港及台灣都有不少高手教路。我最喜歡的兩個貓forum:
(1) HK petpetplayland
(2) 台灣貓咪論壇
如果不介意睇英文, 呢個website都有用:About Cats
繼續貓經~
同好多朋友說過, 始終是一條生命,
去考慮養動物既時候, 一定要先做功課才決定。
依家年代唔同, 唔可以話自己食乜就隻貓食乜。
傳統謬誤, 食魚骨、飲牛奶... 統統都唔可以架!
長食濕糧, 牙仔好易有問題, 只可偶一為之。
乾糧營養包包唔同, 呢樣真係唔懶得, 一定要學習!
綜合了各方資料...
1) 若有4D既糧, 一定唔買。(即是Died, Diseased, Dying, Disabled.)
2) 有meat by-products, 唔買。免得過meat meal都唔要。
3) 選天然成份, 標明是meat的糧。
4) 細細塊的烚雞肉、芝士都是不錯的小獎勵。
5) bb貓可以餵盒裝貓奶。有些貓飲牛奶會唔舒服。
經過寶路事件, 我傾向mix乾糧比貓食, 等佢唔好依賴某種糧。
不過最終都要以貓貓腸胃做依歸。
糧兜方面, 縱合朋友經驗, 不綉鋼矮身兜最好。
下次再談!
唔少朋友知道貓貓出世後都msn我幾時接佢回來,
不如在此談談詳情。 ^__^
bb貓出世後好依賴媽媽, 有些貓媽好醒很會照顧bb,亦有些不太懂,
呢個時期其實幾critical, 所以盡量遷就及避免滋擾貓媽最好。
兩星期後, bb就開始開眼, 但仍未戒奶,
因此最好在bb戒左奶後打左第一支防疫針才接回家。
(最少都要一至兩個月啦! 呢d真係唔好心急, 貓貓健康最重要!
有d人因為唔識點同bb貓餵奶而浪費一條生命, 是多麼可惜的事。)
係咪就咁接貓貓回家就搞掂? 當然不是啦!
事前要準備好貓貓的竇、貓廁所、貓袋、食糧及有關用品。
bb貓離開出生地方, 到一處完全陌生地方, 通常都好驚, 四處亂竄。
如果一早準備好一個籠仔, 可以俾佢暫時安頓在此, 俾時間佢適應。
亦有d貓仔好叻, 好快便適應, 不用籠仔。
可以的話, 最好預先拿有貓媽媽氣味的毛巾/物品, 讓bb安心。
貓糧及貓砂亦最好跟番佢原來用開的, 要轉的話, 遲d慢慢逐少摻雜。
至於接送過程時, 不妨在貓袋裡放一、兩件小玩具, 等佢掛住玩無咁驚。
下回再續!
昨晚發夢在揀貓糧... 嘿嘿嘿! 真是上腦的了。
目前決定左咁:
bb貓的話,大概會試 nutro choice+ fromm or foundations。
都想試felidae既, 不過經常缺貨, 還是作罷。
糧兜要用不銹鋼的, 膠兜易滋生細菌出acne。
貓砂首選綠標everclean。太香的話會mix下紅標。
次選W之豆腐砂+木屑砂...
因此要買雙層有蓋砂盤, 方便轉砂。
每日要同貓貓"茶"oral gel,一星期刷牙一次。
仍然未諗好既:
住屋仍然好花心, 呢幾個好得意:白色屋; 草莓屋或者格仔屋。
袋就看中了呢個, 寵物城度見到個差唔多, 但側面無開窿, 再research下先~
玩具台就想要doggyman... 不過好貴, 要諗諗。
養貓真是好多野準備啊!
手痕畫左d需要準備既野...
昨日在cwb見到之前在日本貓書中見到既可愛貓籃,
不過同事話唔夠大... 所以都是唔買了。
我仍然在摸索究竟邊d地方有可愛的床仔、籃仔或出街袋賣~
平時見到的都是好沉悶的杏、灰、黑、深藍色...
雖然係耐用d, 但我想要‧好‧可‧愛‧既!!!!!!!!!!!!!!!!!!! (吶喊中~)
可能到頭來都是會屈服... 嘿嘿..
但好記得兩年前去代官山途中見到的多間寵物用品店...
d貨品真係好‧ka‧wa‧ii‧架!
|